مخدتي الأنيقة

مرحباً يا أصدقاء ..أتمنى تكونوا بخير 

اليوم بحكي لكم كيف خيطت ( مخدة أنيقة ) 💙

اخترت لونها أبيض وحبيت حتى الاضافات عليها تكون بيضاء 

اشتريت قماشين أبيض واحد اسمه قماش أمريكي خفيف

و الثاني اسمه كتّان ونوعه ثقيل شوي 

وكم نوع كلف دانتيل أبيض .. أنا اخترت خمس أنواع للدانتيل مختفله النقشة حتى يبين
 الشكل وتكون حلوه ممكن انها تكون كلها من كلفه واحدة بس بتكون عاديه شوي ..

لأنها كلما كثرت أنواع الكُلف كلما صارت أحلى

وآخر شي زينه على أطراف المخدة هي تعتبر من الكلف بس ما أعرف ايش اسمها
 بتبين لكم مع الصور 

نجي للمقاسات :

مقاس المخدة ١٥ x ٩ انش

والكلف كل وحده طولها ١٥  انش

وقطن طبعاً للحشوة 

قصيت كل القماشين بنفس المقاس من كل قماش قطعتين ..

أول شي القماش الأمريكي حطيت القماشين فوق بعض و خيطت أطرافه وتركت
 فتحه صغيرة حتى أقدر أعبيها قطن و دخلت الكميه اللي أبيها من القطن جواتها
 وخيطت باقي الفتحة وصارت عندي بالشكل هذا 

ثم بدأت بالقماش الثقيل اللي هو الكتان وطبعاً عندي منه قطعتين بنفس الحجم بس قبل 
أخيط أطراف القطعتين على بعض خيطت على القطعه الأولى من جهه وحدة بالعرض 
الكُلف كلفه كلفه بالتدريج يعني لما أخلص من الكلفه الأولى أنزل بعدها بسطر وأخيط 
الكُلفه الثانيه بحيث إن الكُلفه الثانيه تكون غير شكل الكُلفه الأولى  و هكذا لما تخلص
 أنواع الكُلف اللي عندي وأعيد ترتيبها من جديد لما أوصل لنهاية القماش وتكون قطعه
 القماش كلها كُلف دانتيل تحت بعض

مثل كذا ..

بعدها أثبت القطعه اللي فيها كُلف الدانتيل على القطعه الثانية الفاظيه وأثبت الزينة
 بأطراف القماش وأبدأ أخيطها

من ثلاث جهات والجهة الرابعه أتركها مفتوحه حتى أقدر أدخل فيها المخده اللي
 خيطناها فوق ، وبعد ما أدخل المخدة المحشية أحاول أسكر أطرافها بالدبابيس أو
 المشبك وأخيطها 

و تداااااا ..  صار عندنا مخدة أنيقة 💖

صورة أقرب  .. 🔍

دمتم بخير و دامت أيامكم بسعادة ❤