ماكينة الخياطة .. singar✨

بسم الله الرحمن الرحيم 

صباحكم خير .. ⛅

بتكلم اليوم عن تجربتي مع ماكينة الخياطة ..

في البداية حقيقة ما كنت ما أعرف أي شيء عنها ولا كيفية استخدامها أو إني أحبها ،
 فقط كنت أعرف الأساسيات اللي تعلمناها بالمدرسة من غرز باليد بسيطة ..

و لما كنت في الغُربة كان عندي وقت فراغ كبير .. 

 فـ قررت إني أتعلم كيف أخيط بالماكينة و اكتسبها كهواية جديدة ليّ .. وبالفعل اشتريتها .. 

وقتها كنت ما أعرف كيف أمسك القماش و الماكينه تخيط بنفس الوقت ، مرات يميل 
الخياط يمين ومرة شمال وكأني توهقت شوي !

لكني .. (!) 

الحمد لله صرت أبحث باللغة الانجليزيه في اليوتيوب عن أي شيء خاطري فيه ،
 أو ودي أخيطه وكنت حابه إني أخيط شنطة ميك آب وحصلت لها مقاطع كثيرة مرررة
 سهلة ومبسطه ، ومو شرط انه يكون عندك لغة حتى تفهمينها ، بعدها جبت أغراضي 
ومشيت مع الفيديو حبه حبه لما خيّطت شنطة جميلة أقنعتني كبداية ..

وبعدها تحمست وبحثت عن مقطع كيف أسوي شنطة يد وحصلت فيديو جميل وتابعت
 معاها خطوة خطوة لما نجحت في خياطتها 

ومن خلال المقاطع اللي شفتها كثير تعلمت أساسيات كثيرة في كيفية استخدام الماكينة ، 
وصرت أسوي بعض الأعمال لوحدي بدون مقاطع مثل [ مفرش صينية للقهوة ،
 وسلة للقهوة والشاي ، وشنطة ميك آب بتصميم من عندي ، وخدادية ،و  دُمية ] 

وتابعت أشخاص لها اهتمام بهذا المجال واستفدت منها كمان ، مثل { نورة السلمان } 
صاحبة حساب “ نوريه “ في الانستقرام وانبسطت كثير انه فيه ناس مازالت تحب
 هالشغلة ومستمرة تبدع فيها ..

،،

أما بالنسبة لماكينتي .. من وين أختها وايش اسمها !؟

كنت في أمريكا وطلبتها من أمازون .. وممكن تحصلون أنواع ثانية وماركات ثانيه في
 كارفور عندنا بالسعوديه أوموقع سوق كوم 

اسم ماكينتي .. “ سنجر “ 7258 stylist 

فيها ٩٩ غرزة لتطريز وامكانية التحكم بحجم الغرزة عرضاً وطولاً ، ورز خاص لتحديد 
سرعه الخياطه ، و زر خاص للعقدة بالبدايه والنهاية ، تنظم الإبره بطريقه سهله عن طريق
 حديده تسحب الخيط داخل الابره 

وجاي معاها ( غلاف بلاستك يحافظ عليها من الغبار ،و ٤ مكوكات ، و ١٠ دواسات ، 
و ٤ ابّر  ٢ منها للتطريز و٢ منها للخياطه العاديه ، وريشه للتنظيف )

أنواع الدواسات اللي معها  = لتركيب الزرار ، و زّم القماش ، والتطريز ، وتركيب
 السّحاب ، دواسه للخياطه العاديه ، لثني طرف القماش ، دواسه للابره المزدوجة ، 
دواسه للبييه ، دواسه لأقمشة الشيفون  

هذا رابط لمقطع فيديو موضح فيها لكل الأشياء اللي جت مع الماكينة .. 
فيديو للدواسات

أهم الأشياء اللي ممكن تحتاجونها كبدايه في الخياطة ..( مقص ، خيوط ، دبابيس ، طماطه
 اسفنجيه للدبابيس ، متر ، مشابك بلاستيكيه للاقمشة الثقيله ، نشال يفك الخياطة )

طبعاً ما عندي خلفيه عن باقي الماركات للمكاين مثل براذر و غيرها لكن ممكن تبحثون 
عنها بأمازون وعن تقيمها  وتحصلون المواصفات اللي تبونها أو تعجبكم فيها ..لأنه يمكن 
في أحسن من ماكينتي أو أقل منها أنا من خلال تجربتي عجبتني كثير وانبسطت عليها
 خصوصاً كثرة الدواسات ، وإذا أنتِ حابه المهنة لا تشتري شي رخيص مرررة لأنه
 بيخرب علطول وما تكمل معاك أكثر من سنتين بالكثير 

استفدت من الماكينه مو فقط في الأعمال وبس الحمد لله ..

• استفدت إني تعلمت مهارة جديدة وحبيتها 
• عرفت كيف أخيط وأعدل بعض الملابس عندي من دون ما أحتاج للمشغل أو الخيّاط

 صحيح ما بعد وصلت مرحله التعديل الشيء الكبير بس إنها أغنتني في الاشياء
 البسيطة إني اسويها بنفسي 

• استفدت اني أقضي وقت فراغي بشيء مفيد وممتع
• سويت منها مشروع سعنوني 💖

 والحمد لله لها ألحين سنة عندي ومازلت مبسوطه عليها لدرجة اني صرت أحس انه المفروض كل بيت يصير فيه ماكينة خياطة 😊

دمتم بخير .. و دامت أيامكم بسعادة  ❤